Wenn´t dat op´e Welt doch geef !
Kumm,
Jan-Christoph, höör mål to,
wat ik di nu
vertell´n doh:
"Güstern
keem de Wiehnachtsmann
mit sien
Schrievbook bi mi an,
fröög, wat du
ok åårtig weerst,
fein op diene
Öllern höörst,
wat di mit
Christin´ versteihst,
ehr nich argerst
un nich sleihst,
wat du ok op´n
Radweg föhrst
un bi -Root- keen Strååt paßeerst,
achtern moie
in´ Auto sitts,
keene Steens in
Ruten smitts,
vör´n
Flimmerkist sitts noch lååt,
Football spaelst
går op de Strååt !
Jå, nå sowat
fröög he mi !
Ik heff denn
vertellt vun di,
dat du fein to
Hand uns geihst
un di dull op´t
Fest al freust.
Håårkleen
schreev de Wiehnachtsmann
dat in sien dick
Book denn an.
Un denn sae he
noch to mi:
Ruprecht kümmt
de Dååg vörbi,
gaevt
Jan-Christophs Wunschlist mit,
denn hebbt wi
all´ns swart op witt. - -
Nu, mien Jung,
schütt ut dien Hart,
dat´ all goot
un richtig warrt."
Jan-Christoph
håål deep Luft un sae:
"Fein
wörr´t, wenn ik kriegen daeh:
Peerd un Koh
un Schååp un Swien,
kunn ok´n
gansen Buernhoff sien !
Deerten
heff´k vun Harten geern,
kunn mit jem
goot Wiehnacht fiern !
Autobåhn
wörr ok nich slecht,
keem ok woll
mit Rullschoh t´recht,
Iesenbåhn un
Dampmaschien
mag ik woll
heel geern lied´n. - -
Wenn´t
dorvun een Deel kunn´t waen,
bün ik ok
al goot to fraed´n."
Wilhelm Mohr, 1995 - in Europlatt överdrågen vun Peter Kollund, Rosendåhl 1997