Vun Kuddl Sokrates
Mien Natalje seggt: "Du", seggt se, "ik bün dor nu gans un gar mang dör. Wat is mi dat nu mit de Oder-Neiße-Grens. Wo geiht dat nu würklich üm ?" Ik segg: "Dat hannelt sik dorüm", segg ik, "wat nu disse Lännereen weg sünd, oder wat wi ehr wedderkriegen, wenn unse twee Staatens, de ja beto keen sünd, eenst weddervereenigt sünd." - - "Aha", seggt mien Natalje, "is ja klaar, wüllt wi ok wedderhebbn !" - - Nu kümmst Du.
|
Denn muß bikaam, as de ool Sokrates. De Macker harr Krach mit sien Ollsch, weswaegen he op´e Straten ´rumlatschen daeh un de Lüüd Fragen stell´n daeh. He froog de Koh dat Kalv af. Un he froog so, wat de Mackers bi se ehr Antwoortens vun süvst op de´n richdigen Trechter kaam´n daehn. Dorüm glööf he, wat he sien Tietgenossens in Athen de Vernimm un de Tugend bibring´n künn. Dat Tweete middels dat Eerste. Ik dach glieks doran, wat he dat mal mit unse Regeerung versöken schull. Wenn dat ok harden Kraam is, ´n utsichtslose Saak antofang´n. Vun waegen Mangel an Masse bi Eerstens un dorüm ok Tweetens. - - Aver ik denk: "Bi Natalje künnst dat ja mal versöken", denk ik, "is ja en´ normal´n Minschen." So worr ik ut Kuddl Schnööf to Kuddl Sokrates. |
Ik segg: "Glöövst du", segg ik, "wat wi de Weddervereenigung kriegen dohn ?" - - "Büst du noch to redden!" seggt mien Natalje. Ik segg: "Avers, wenn wi de Weddervereenigung nich kriegen", segg ik, "wo wullt du denn an´e Lännereen güntsiets vun´e Oder-Neiße ´rankaam´n ?" - - "Dat is mi schietegaal", seggt mien Natalje, "ik will ehr wedderhebb´n !" - - Nu kümmst Du.
Ik segg: "Wodennig wullt du denn de Lännereen överhaupt kriegen", segg ik. Mien Natalje seggt: "Wenn dat garnich anners geiht", seggt se, "mit friedliche Mittels." Ik segg: "Wo weer dat mit Krieg ?" Mien Natalje seggt: "Sülvst wenn wi dat wulln", seggt se, "kunn´ wi dat nich. Dor hinnern uns ja unse Böverbefaehlshabers an." Ik segg: "Avers", segg ik, "vördat wi de Lännereen kriegen köön´, mööt wi de Weddervereenigung hebbn !" - - "Klaar", seggt mien Natalje. Ik segg: "Avers, du glöövst doch nich an´e Weddervereenigung !" segg ik. Mien Natalje seggt: "Woran ik glöven doh", seggt se, "is doch pottegaal. Wi sünd doch nich in´e Kark. Ik will de Weddervereenigung aeven eenfach hebb´n !" - - Nu kümmst Du.
Ik segg: "Mein Gott", segg ik, "du glöövst waeder an dat Eene, noch an dat Annere. Wullt avers Beides hebb´n. Wo blifft denn dor de Logik ?" Mien Natalje seggt: "Snacken wi nu vun´e Oder-Neiße-Grens", seggt se, "oder vun´e Logik ?" Ik worr nu langsaam füünsch. "Vun all´ Beid´": bölk ik. Mien Natalje seggt: "Dat hett aver aeven nix mit´nanner to krieg´n." - - Nu kümmst Du.
Ik segg: "Wenn du Beides hebb´n wullt", segg ik, "un togaeven deihst, wat du eerst dat Eene hebb´n muß, vördat du dat Annere kriggst un dorum keen Krieg maken kannst, sodenn geiht dat doch blots över´n Verstännigung, nich ?" - - "Klaar", seggt mien Natalje. Ik segg: "Un glöövst du", segg ik, "wat de Pol´n . . ." "Höör op", seggt mien Natalje, "mit dat Glöven. Ik will dat aeven eenfach hebb´n." Deern, Deern, nu worr ik doch so füünsch, dat ik wedder bölk´n daeh: "Du kriggst denn aver garnix", bölk ik. Mien Natalje seggt: "Heff ik denn seggt", seggt se, "dat ik wat krieg´n doh ? Ik heff blots seggt, wat ik dat All´ns hebb´n will. Kann ik dat denn nich ?" - - Ik kreeg knapp noch Luft: "So kriggst du aver g a r n i x", röchel ik nochmal. Mien Natalje seggt: "Wo wulln wi denn henkaam´", seggt se, "wenn dat All´ns wat warrt, wat wi wulln. Dat wörr je woll en dull´n Swienstall afgaeven. Denk blots an de´n Kalkarschieter, de´n Orion-2000, oder de´n Transfix. Avers hebb´n wülln, heet ja nich kriegen mööt´n. Un dat warrt man woll noch dörv´n. Wörr ja woll noch schöner." Nu worr ehr füünsch.
| Ik heff mien Muul hooln. Ik dach doran, wat de ool´n Griechen de´n ool Sokrates vergifft hebbt. Sülvst de ! Un ik will geern noch´n baeten wat laeven. Lever lebennig Kuddl Schnööf, as Kuddl Sokrates un doot. - - Nu keem avers miteenst Michail, meisto as ut de ool Bibel un uns´ Helmut worr noch grötter as groot, avers sien Klook keem dor nich recht mit; he kann ok nich een Sokrates bi sik lieden. Kiek di mal sien Mackers an, mi schall mal verlang´n, wat dat nu bi Europa baeter warrt ? Aver in´e verdreihte Welt vun hüüt büst du ja meist´n Pharisaer, wenn du keen büst !? Vun waegen de "Leidkultur", oder weer de Leitkultur meent ? |  |
Jochen Steffen, 1922 bet 1987 - revideert vun Peter Kollund, Rosendahl 1996