Sleswig-Holsteen Musikfestival

Minsch, wat weer ik froh ! Dreep ik doch annerlets, dor bi dat Konzert in Hasseldörp weeßt woll, dat vun dat Sleswig-Holsteen-Musikfestival, mien ooln Fründ Hans-Dieter. De keem mi jüßt topaß ! Ja, Hans-Dieter, mußt waeten, de weet Bescheed mit sowat. Bi Kunst, egaal wat dat nu üm Biller oder üm Musik geiht, dor kannst op an, dor weet he wat vun af !

Ik ja glieks op em dal: "Segg mal Hans-Dieter, kannst du mit ehr Musik wat anfang´n ? Ik heff de heele Tiet dorsaeten un mi dor eenfach nix bi ´ruthöörn kunnt !"

Em leep so´n lütt Smuustergrien´ över´t Gesicht: "Tja, du, dat is mi fröher ok so gahn", meen he dor. "Avers, siet dat ik dor mal mit een vun de groten Künstlers över snackt heff, dor heff ik de´n Bagen ´rut ! Un dat is eegens heel eenfach."

Ik mutt em böös döösig un fraagwies ankaeken hebbn, so lach he mi miteens an ! "Nae, du, dat´s würklich so ! Weeßt du, de gode Mann, de hett mi dat so verklaart: So´n Künstler, egaal wat he vun´ Aart Kunst maken deiht, de denkt un föhlt dor wat bi un dat bringt he denn to Papier, dat heet op´e Lienwand oder op sien Notenblatt. Un denn wiest he dat de Lüüd un luuert nu af, wat de sik dorbi denken doht oder wat för´n Föhlen ehr dorbi ankümmt. He will uns anrögen, rögen in´ Kopp un in´e Seel, dat schüllt wi denn sülven dohn ! Fröher, hett he mi noch seggt, dor weer dat de Künstlers noog, wenn wi eenfach tokieken un tohöörn daehn un denn uns´ Freud doran harrn. Man, de Modernen hüütigendaags, de wüllt, dat wi uns üm ehr Kunst ´n Kopp maken doht - - uns dor so richtig ´rindenken doht !"

As ik dor nu nich glieks wat op segg´n daeh, dor meen he noch: "Süh", sae he, "so hett he mi dat verklaart - - un nu kaam ik mit moderne Biller un ok mit so´n Musik allerbest klaar !"

Dor wull ik dat nu avers waeten ! Nu schull he mi vör´t Brett ! Denken, bi de Tuteree schull een sik wat bi denken ? - - Ik bün ja´n ehrlichen Minschen, dorüm will ik dat hier man driest segg´n: Ik heff bi de mehrsten Stücken blots jümmer dacht: "Is dat nu al toenn oder kümmt dor noch wat ?" Un ok mal: "Wanehr fangt se nu eegens richtig an ?" Un dorüm heff ik mi mien Programmheft ut de Tasch haalt un Hans-Dieter dat ünner de Naes hool´n: "Un wat hest du dor nu bi dacht ?" Un heff op dat eerste Stück wiest: "Eingang und Michaelsruf".

Dor trock he sien Programmheft ok ´rut, slöög de sülvige Siet op un sae: "Dor heff ik mi henschraeven: "Im Stau". Weeßt woll, vunwaegen dat Dör- un Gaegen´annertuten."

Minsch, wat weer ik verbaast ! Dat harr he dor ´ruthöört ? Avers, nu weer ik ja neeschierig worrn: Wat he woll bi de annern Stücken höört harr - - dat wull un wull ik nu ja ok waeten ! "Wies mal her, wat du dor noch so schraeven hest." Un dormit nehm ik em sien Blatt ut de Hand. Kinnerslüüd, dor heff ik avers kaeken: Summa für vier Trompeten: "Übungsabend", un denn: Assoziationen: "wie geht das bloß?" Bi de naechsten Stücken, dor harr he dat, woll vunwaegen de Düüsternis, krüüz un quer över´t Blatt smaert: "Der kann es - - der kann es noch nicht".

"Du", heff ik em dor fraagt, "weer dat dat Stück, naem de een blots jümmer "pphhh" maakt hett ?" Hans-Dieter klopp mi op´e Schuller: "Kiek an, du kümmst al dor achter !"

Dat hett mi dor richtig inlüücht, hett mi dat. Un denn laes ik ja wieder: Dor stünn denn noch: "Tratsch der Marktweiber", "Hupkonzert", un gans ünn´: "Drei Posaunen zum Geburtstag". "Un dat hest du dor all ´ruthöört ? Un meenst du, dor sü,nd de Künstlers mit tofraeden, mit dien Aart ´ruthöörn ?"

Hans-Dieter, de grien mi an: "Dat, mien Jung, dat is nu wedder de jemehr Saak ! Adjüß, mien Fru töövt dor al mit´n Wagen." Un dor leet he mi mit stahn.

Ik bün de´n Avend wat nadenkern na Huus föhrt. Un ik bün dor jümmers noch an´t Simmeleern över: Hett he mi dor nu mit op´n Arm naehmen wullt ? Oder hett de "grote" Künstler em dor mit op´n Arm nahmen - - oder hebbt de uns op´t Lets all tohoop op´n Arm nahmen ? Wat meenst du ?

Arne Bruhn, 2000 - revideert vun Peter Kollund, Rosendahl 2001

torügg in de´n Micheelimaand

wokeen dat nu ok mal probeern müch, de kiek in dat Programm vun

www.shmf.de