Dat "goll´n Kalv"
Op´n eersten Kiek is dat Geld ja´n eenfache Saak; dat hett´n Vörsiet un´ Rüggsiet. Denn Geld is ja man blots´n Pand för elkeen Arbeit oder Saak. Aver, nu gifft dat ja ok de Politikers un wiel de ok düchtig sünd, maken de´n Barg Polletik. In´e Polletik geiht dat ja ok op´e Vörsiet tomehrst um de Saak oder Arbeit, aver wenn dat denn op´e Rüggsiet to geiht, so süht dat maennigmal heel anners ut, sodenn sünd dor mit´nmal Mehrheiten vael wichdiger.
Aver, dat heet ok Tiet is Geld un is ja ok richtig so. Man, in´e Polletik warrt de Tiet blots all´ veer Johr tellt un bi so´n Versaekerung noch recht wat laenger. Dat kunn waen, wat an´ Enn bi´t Afraeken, dat Geld in Rubel oder Dollar tellt warrt un de Mark man blots´n paar Cent noch gellt. Denn warrt uns´ Geld to Müll, mannu, Müll kost aver ok Geld, kiek di mal dien Afraeken an. -- --
Doch nu hebbt wi to´n Glück noch de Markweertschop un dor geiht dat um de´n Verdeenst. Un bi all uns´ Düchtigkeit kümmt dor ok´n groten Barg tosaam. Dat heet, wenn een genau henkickt, sünd dat wedder twee Bargen: Op´e Vörsiet een mit Vermöög´n un op´e Rüggsiet een mit Schull´n. Un de Hööchde vun´e Bargen nöömt wi Status, dat weer fröher ok bi de Karken so, do güng dat um´e Grötte un Hööcht vun de´n Toorn. Aver, wat tellt hüüt nich all´ns to uns´ Status: Groot Auto, groot Reis, groot Huus oder blots´n groot Barg Vermöög´n oder Schull´n.
| Wenn du dat nich glöövst, sodenn maak man mal´n Barg Vermöög´n oder eenfach Schull´n. Dat heet, du sitts jümmer op´e verkehrte Rüggsiet, de´n groten Verdeenst hett dien Spaarkaß op´e Vörsiet. Sodennig hebbt de Politikers dat doch baeter, bi unsen Staat liggt ja de Vör- un Rüggsiet in een Hand un dor warrt denn ok fix hen un her dreiht. Wenn dor dat "goll´n Kalv" op´e Vörsiet fiert warrt, sodenn gifft dat op´e Rüggsiet en Slachtfest, sowiet dat de Mehrheiten bi uns´ statistische Statisten dat tolaten. | |
Aver, wenn uns´ "goll´n Kalv" nu BSE-Süük kriggt, ik glööf denn hölpt uns blots noch de Euroreform -- -- oder wat meenst du ? De groten "Globalplayer" hebbt ja DM-flüchtig de´n Dollar oppuust, wieldat se de Reform so slau umgahn. De övergrote "Spaargeld-Monte-DM" warrt woll Feddern laten möten. De hele Weertschop müß doch boomen ? Wokeen dat kann, müß bet Ultimo sien Spaargeld op Null hen investeern, oder as de Insolvents-Profis kort Schull´n maken. Denn ok uns´ klook Minister Eichel will ja eerst na de´n "Umtuusch" sien groot Schull´nbarg lütter maken ! Ja, un nu kiek di de´n Maxi-Bedriev "Düütsche Bahn" an, eerst wull man gau mit plus in´e Aktien stiegen, un nu hett dor een nadacht un gau mal 5 Milliarden Schull´n utraekt. Wenn nu dör de´n "Umtuusch" ok blots 20 % kompenseert warrn, maeten an de´n Weltdollar, so sünd dat alleen 1.000.000.000 DM oder denn 500.000.000 Euro, dor muß du as Stüerheini lang för "striggen" !
Aver, dat is ja nu ok al Snee vun Güstern. Wat sik nu de Finanzjongleure mit ehr grote Immobilienblaas in US-America utklabüüstert hebbt, dormit Europa mit Hölp vun sien Bankenrettungs-Programm in Verschullungs-Nootstand kümmt. Dat fung al an, as 1989-90 oh Wunner de düütsche Vereenigung keem un de grote Oostblock ut´neen full un somit Europa gau grötter worr, dor worr US-America bang för sien flöödigen Dollar.
Ok W. Bush sien viegeliensche Irakcrash worr batts maakt, dormit S. Hussein sien Eurohannel mit Dollarcash aflööst worr. As denn de rieken Scheichs vun´e vereenigten Emirate anfungn anstatt in Dollar nu in Euro to investeern, dor worrn de US-Experten füünsch. De US-Republikaners gungn denn 2008 op "Kur" un de lang un goot plaante Finanzcrash worr utlööst, de to Hauptsaak de´n staevigen Euro drapen schull un dat leep as smeert un löppt hüüt noch. Un wenn de Euro wat to Roh kümmt, warrt gau mal wedder an de Raitingschruuv dreiht. US-America hett dat dormit ja ok heel eenfach, se weten nipp un nau, wat en Grootdeel vun dat groot Europa blots sonennte Europäer sünd un wenn de bang maakt warrn mit Spaarn, sodenn geiht dat Grootkapital fix op´e Flucht, meist in Dollar, deelwies över de lütt Swyz. Aver de gewaltige americaansche Överschullung warrt dat nich vael hölpen, doch egaal, en flöödige Euro paßt woll baeter to en flöödigen Dollar ! ?
Peter Kollund, Rosendahl 1999 - 2010, aver jo keen Panik nich !
PS. Nu warrt hier ja al lang un breet över Reformen snackt, wenn een aver de verlaeden Tieden t´rügg luert, sodenn weer de lets Reform jümmers ´n Währungsreform ! Nu hett Michael Grandt hierto en feine Book maakt
"Der Staatsbankrott"(kommt) vun Kopp Verlag. Mit Achtergrünn, de een baeter kenn´ mutt.
"Eegenlich is dat goot, wat de Minschen uns´ Bänkers- un Währungssystem un ehr Polletik nich verstahn."
Henry Ford, US-Fabrikant
Aver eegenlich sünd Politiker ok blots Minschen, un ik bün nu bang, wat de ok mien Platt nich verstahn !
Eegens harr ik düssen lütt Straemel för de´n NDR maakt. För de´n "Vertell doch mal" - Wettbewarv 1997 to dat Thema "Dat leve Geld". Doch ik keem nich in´e Utwahl, vunwaegen de "atmosphaerische Mischung" un dotiet weern de "Bargen" ja ok noch nich so hoog, aver nu tööv mal, wi hebbt nu ja de´n Euro un uns´ Finanzminister heet nu Schäuble - vellicht hölpt de uns nu, or Se ?
PS. kieken Se blotsmal, wat de Meister Tomicek uns mit sien Cartoons to vertelln weet, grootartig maakt, mehr as duusend Wöör seggn nich mehr !
ünner http://www.tomicek.de/