Nå´t Veeh kieken
Vunåvend kiek ik wedder mit Peter nå´t Jungveeh. ´naem dat löppt ? Åch, heel wiet an´ Butendiek. Wi mööt eerst en Enn op´n Buerndamm langs, klattern bi Hannes-Buur sien Peerkoppel över´t Rick un gåht denn an de Wåterkuul vörbi nå unsen Appelhoff to. Dor geiht dat över´n Steg, denn kummt noch de Staekrövenacker, un denn kummt de Weid, ´naem dat Jungveeh löppt.
Dat is´n schöön Enn to lopen. De Buur hett to Peter seggt, jeden Åvend nå´t Veeh kieken, dat daeh nich nödig. Dat kunn he nich verlang´n. Tweemål de Waek, dat weer noog. "Nae", hett Peter seggt, "dat dücht mi nich noog. So´n Jungveeh is övermödig, wenn dat lang op´n Stall ståhn hett. Wo licht kann een dat anner in de´n neekleiten Groov stöten !"
Nu gåht wi jeden Åvend dör de´n Butendiek un kiekt nå dat Jungveeh. Vunåvend wedder. Bi´t Slöpenlock, dor luert Peter jümmers op mi. Dat is schöön, wat dat Veeh so wiet buten is. Peter meent dat ok. Bi Hannes-Buur sien Rick hölpt he mi ´röver un op´n Steg fååt he mi bi de Hand. Un denn ståht wi vör´t Schütt un tellt dat Veeh.
"Kiek mål, Dörten", seggt Peter denn, "kiek mål, dat Sneewitte is al wedder´n Stück wussen !" "Jå", segg ik denn, "dat dücht mi ok."
"Höör mål, Dörten", seggt Peter denn, "höör mål, wat de Puustepoggen quarkt. Dor müß mål de Ådeboor mangkåmen." "Jå", segg ik denn, "dat dücht mi ok."
"Kiek mål, Dörten", seggt Peter denn, "kiek mål, wat de Voß sik bruut. Morrn warrt dat Waeder goot." "Jå", segg ik denn, "dat dücht mi ok."
So ståht wi vör´t Schütt un Peter hett mi´n Barg to wiesen. Wenn´t schumm´rig warrt, gåht wi wedder t´rügg. - - - Dat is schöön, wat de Weg so lang is. Peter meent dat ok. Op´n Steg fååt he mi wedder bi de Hand un bi Hannes-Buur sien Rick hölpt he mi ´röver. An´t Slöpenlock gåht wi ut´neen.
Wi hebbt en frischmelken Koh in´ Stall. De mutt ik Klock teihn noch mål melken. Denn mutt dat lütte Kalv ok börnt warrn. Is´n dwallerig Deert, dat Kalv. Will nich ut´n Börnammer supen. Ik mutt dat jümmer mit sien Snuut in´e Melk stöten.
Anner Jåhr kummt dat mit dat anner Jungveeh op´e Weid. Un denn ståh ik wedder mit Peter vör´t Schütt as vunåvend un Peter seggt denn wedder: "Kiek mål, Dörten", seggt he denn, "kiek mål, dat Sneewitte is al wedder´n Stück wussen !" "Jå", segg ik denn, "dat dücht mi ok."
Magretå Brandt, 1915 bet 1992 - in Europlatt överdrågen vun Peter Kollund, Rosendåhl 2001
PS. Wokeen nu hier noch op BSE gruuvelt, de is woll nich to hölpen, dat dücht mi ok.