Naturgewalt 1978-79

Wi dücht uns sachts klöker, as de ool Vader, de Leve Gott. Wat to´n Bispill de Technik angeiht, - - wat so´n neemoodschen Computer is, - - dor is rein nix gaegen to seggn. Mit all de Knööp un Tasten köönt wi heel goot ümgahn, - - dat versteiht sik vun sülven. Mußt blots de richdigen Tasten drücken, - - glieks deiht de "kloke" Computer di mit di sülm bekannt maken. Wat he di mit sien elektronischen "Charakter" (Programm) opwiest - - is jümmers´n beslaten Saak.

Man, wat de Computer disse Daag nich waeten kunn, - - ditmal, - - Nae ! - - Ditmal weer em sachts "de dor baven" över. De ool Vader wull mal wiesen, wat He ahn Computer - - blots so - - mit een Hand all´ns t´recht kriggt. Wat de lütt Minsch mit sien Grips garnich so gau faatkreeg. Wieldat je keeneen mehr glöven deiht, dat sowat vundaag noch mööglich is. - - "Mi köönt ji nix wiesmaken" - - hett He wiß dach.

Vun een Dag to´n annern püüster He unverwahrens vael Snee op´e Eer dal, puust de witten Sneesteerns meist bet to dree Meter hoge Sneebargen tohoop. Dat gung nich suutjepiano. - - Oha ! - - Nae, dat klung sachst as´n "Allegretto" - - sotoseggen as´n Dröhnen vun de Orgel in´e Kark. - - Jüßt as bi de Sündfloot - - de He, - - wat in´t eerste Book Moses to laesen is, - - veertig Daag un Nachten op´e Eer pladdern leet. Man, Noah kunn sik gau noch´n Arche to´n Swömm´ buun, - - ´naem he un sien "Crew" denn je ok överlaeven daehn.

Kannst al Bang kriegen, wat de ganse Technik mitsamt de´n Computer oplets Tüünkraam is. Wat deiht´ hölpen, wat se opstunns in´t Feernsehn "Hööcht un Deep" anseggt. Wat´n Tostand ! - - Mit´nmal hett dat´n gelehrten Mann, de in´t Feernsehn dat Waeder ankünnigt, meist ok de Spraak verslaan. - - Tominnst glööf ik dat ! To de Tiet möten de sik rein dröömelig vörkamen.

Un edder so´n "Kriesenstab" - - mit de´n böversten Mann an´e "Sprütt", - - de an´n grönen Disch sitten deiht; - - miteens sünd de Minschen ´samt Hoffstaed un all de schönen Autos heel un deel in´e Sneebargen versapen, - - bina ! Boots ! Eenfach ut ! - - Insniet ! - - Mit Schüffel un Ammers hölpt sachts nix mehr. Wo maennigeen kann licht in grote Sneehupens verschütt gahn !

Wo kann´t angahn, disse Lütten

hebbt mehr Knööf, as 300 PS

Nu, wo de Minsch sien lütt Auto so bannig geern hett, is dat to allereerst nöödig, sien lütten "Blickkasten" wedder uttobuddeln. Wat uns´ Autos angeiht, - - dor sünd wi sachts jümmer grootsnuutig west, - - wat dat ok jo keen Snuurpieperee is. ´n nee Auto, - - sodenn is de Minsch doch tofoot opsmaeten. Liekers, - - de "Verkehr" mutt "flüssig" blieven, hool di fuchtig !

Man, nu mutt sik so´n Sneefraes dör de Straten wöhln. De Storm geef em ok´n Backs ! - - Wahrraftig, he harr al aartig Slagsiet; op´tlets bleef he in de Sneebargen staeken, - - fastfohrt ! Na´n tweeten Anloop un´ lütt Stoot vun achtern, keem he denn wedder in´ Gang. De lütt Stoot keem vun "Leo", as so´n Panzer hüüt heet un ok as "Krankenwaag" in disse Daag togang weer, aver ok "Leo" wöhler sik fast, wieldat de witte Pracht so´n ool Waterlock fein todeckt harr. Un wat´n "Hubschrauber" is - - nae, de leet sik ok nich nöödigen. Tominnst köönt wi uns dat nich leisten, wat de arm´ insnieten Minschen hungern mööt. Uns´ Leve Gott harr vergaeten, Broot un Botter mang de´n Snee to mengeleern. - - Na, op´tlets mutt een ja mit disse "Strategien" Bescheed waeten, - - aver so maennig en Buur wuß nich, wonaem he mit so vael Melk hen schull !

Bilütten hebbt wi dat ok t´recht kraegen. Nu kann ja nümms afstrieden, dat wi mit so´n Problem - - ut de Luft "versorgen" - - nich "up to date" sünd. - -Wat dat wedder heten schall ? - - Tschae, dat´s Een, de hüütigendaags nich´n baeten Plie in´ Kopp hett - - besünners bi´t Organiseern. - - Mitsnacken is wichtig - - ´naem so´n Unwaeder al noog Sorg, Möh un Sweet kost. - - Bito maennig vael Geld, - - uns´ Geld. Wichtig is jüßt, wat de Minsch dat warm hett un "Kalorien" för´t Lief - - dat hett een an allernöödigsten. - - Un hüütigendaags raegelt dat ja all´ns "Kollege" Computer - - avers blots mit "Strom"! - -To´n Glück full de bi dat Unwaeder nich överall ut, sünst harrn wi sachts noch mehr tolehrt.

Man, sünd wi al över´n Barg ? Ik weet nich recht ? - - De Leve Gott hett dor sachts sien eegen Meen. Vael fragen deiht He wiß nich. Un uns verdeffendeern, - - dat tellt nich groot. - - Wat ik glööf ? - - Dat barmt em nich. He hett dat jüßt nich bedacht, ´naem dat op uns´ole Moder Eer togeiht.

Baeten spietsch pliert He mit´n Grientje üm Naes un Ogen vun´ Haewen dal. "De överkloke Minsch warrt nu mal wies, keen dat Seggn hett !" Wat He maennigmal füünsch is - - ja, dat wüllt wi em geern toglöven ! Wo weet, wolang He uns Minschen noch op´e Finger kloppen deiht ? Sien Tiet kennt keen Anfang un keen Enn nich ! Sneedrieven, Iesküll un graesigen Noordoost gifft He bito, - - "gratis" sotoseggn. - - Gottweetwat för Fiesematenten He noch mit uns vör hett ?

Jep Nissen-Andersen, 1896 bet 1974 - revideert vun Peter Kollund, Rosendahl 1995

Åhn Koorn keen Broot. - - Åhn Broot is Noot. - - Wi Minschen laevt so gau dorhen un finn´ keen Tiet to en Besinn´.				Wi laevt in´ Dag, wi singt un lacht, hebbt satt to aeten. - - Hebbt wi´t vergaeten ? - -

Uns drifft de Hast, åhn Roh un Rast dagut, dagin. - - Seht wi de Sünn ? - -				En Brootköst fallt to Eer, wi kiekt kuum achterher. Is hillig eerst dat Broot, wenn wi in Noot ? - -

Wi quarkt un stöhnt, vertellt un dröhnt un snackt vun Noot. - - Acht wi dat Broot ? - -				Dat geef en Tiet, liggt t´rügg ni´ wiet. Slöög Een de´n Annern doot, üm en Knuust Broot !