Miggelreem un Mullewarp
Nåmiddags güng Miggelreem
so stillvergnöög op´t Feld,
do fung de Eer to baevern an,
un Mullewarp plier in´e Welt.
"Mullewarp", sae Miggelreem,
"wokeen mååk dor so´n Larm ?"
"Ik bün dat blots, un wull di nich
dien Tippeltour verdarv´n."
"Mullewarp", sae Miggelreem,
"wodennig kummst du hierher ?"
"Ik heff twee Schüffeln as mien Hann´
un grååv mi dör de Eer."
"Mullewarp", sae Miggelreem,
"wonehr is denn dien Huus ?"
"Ik wåhn dor in´e swatte Eer,
mien Nåver is de Muus."
"Mullewarp", sae Miggelreem,
"wonehm kummst du an´t Licht ?"
"Ik kååm blots kort un ut Versehn,
ik mag de Sünnschien nich."
"Mullewarp", sae Miggelreem,
"wat hest du denn to aeten ?"
"Ik fraet de Mett, de Kakerlåk,
de Pogg nich to vergaeten."
Vördat de lüttje Miggelreem
vun sik vertellen kunn,
do weer de ole Mullewarp
al in´e Eer verswunn´.
Ute Christiånsen, 1980 - in Europlatt överdrågen vun Peter Kollund, Rosendåhl 1996
De Flyerling
"Moder, ik heff en Flyerling sehn,
he floog dörch dat Finster to mi."
"Swieg still, Kind, un slååp, dat kann doch nich waen,
de Winter is lang nich vörbi."
"Moder, de Flyerling steiht an mien Bett
un seggt, he kümmt vun so wiet."
"Dat is dien Fewer, nich bang sien mien Lütt,
dat geiht wedder vörbi mit de Tiet."
"Ik bün gårnich bang, he is doch so fien,
mit Flünken so witt as Snee."
"Du dröömst vör di hen, slååp lever nu in,
denn deiht di ok bald nix mehr weh."
"Mi deiht gårnix weh, he singt mi en Leed
un höllt mi dorbi beide Hann´."
"Deern, snack nich so´n Krååm, dat geiht mit de Tiet,
du mååkst mi jå sunst noch gans bang !"
"Moder, he hett mi en Söten gaeven
un nümmt mi nu op sien Arm.
Leef Moder, adjüß, he flüggt mit mi aeven,
ik schall ok en Flyerling warrn."
Ute Christiånsen, 1980 - in Europlatt överdrågen vun Peter Kollund, Rosendåhl 1996
PS. Wenn een mehr över Flyerlings oder Bottervågels waeten will, so kiek nå bi
http://www.schmetterling-raupe.de
klook mååkt vun Walter Schön, eenfach wunnerschöön.