"Ik bün al dor !"
Annerlets heff ik mål wedder Mudder Platt dråpen ! Se weer de lets Jåhrn doch wat schråkelig worrn un man blots noch af un to ünner de Lüüd kåmen. Man, wat weer ik verbååst, as se mi in´e Mööt keem: Pielop, mit lüchten Ogen un so´n recht vergnöögt Smuustergrien´ üm ehr Lippen ! Un wo lichtföötsch se weer ! Wat üm all´ns in´e Welt weer paßeert ? Nå, un dat heff ik ehr denn jå ok foorts fråågt.
"Tjå, dor kickst du, wat ?" fröög se t´rügg. "So hest´ mi woll lang nich sehn ? Glööv ik di, mien Jung ! - - Åvers, dat gung mi ok al siet vaele Jåhrn nich so goot !" Un se hüpp recht so vör mi hoog un sweut ehr Kleed. - - Un denn, denn geef se mi´n Söten ! Dunnerkiel åvers ok ! Harr se sik en´ Lüttjen antüdelt ? Oder weer se op ehr olen Dååg braegenklöterig worrn ? Dat güng mi noch so in´ Kopp ´rüm - - un dat mutt se jå woll in mien Ogen sehn hebb´n: Se hååk mi ünner un lach mi an: "Ik bün so nüchtern as´n neeboorn Kalv ! Un mien Kopp, de is so klåår as man wat ! Ik freu mi blots unbannig - - dat is all´ns !" Un denn fröög se mi: "Laest du denn keen Blatt ? Höörst de denn keen Rådio ? Wat se sik um mien Süster Hoog in´e Wull hebbt, verlaeden Waeken ?" - - "Åch", sae ik so´n baeten unsaeker, "meenst du vunwaegen de Rechtschrievreform ?" Un ik keek ehr twievelmödig un unglöövsch an - - wat harr se denn dor nu mit to kriegen ?
"Jüßt De meen ik ! Nu kümmt se ok wedder op´e Eer dål ! Nu warrt wi würklich lieke Süstern !" Wulken trocken över ehr Gesicht: "Wat hebbt se mi åvers ok tarrt, wat hebbt se mi dåldükert ! Ik weer keen Språåk, hebbt se seggt, ik harr keen Schrievsprååk nich ! - - Dor klung mi dat Ministerwoort ut Sleswig-Holsteen vun de "gleichberechtigten Schwestern" doch as Hohn in´e Ohrn !" Åvers, denn lach se wedder un breed de Arms ut: "Vörbi - - all´mål vörbi ! Nu ståht wi wedder blang´nanner un liekop !"
Ik kunn dor jümmers noch keen Klook in kriegen - - wat schull de Rechtschrievreform vun´t Hoogdüütsche nu blots mit Mudder Platt to dohn hebb´n ? Se hüpp vun een Been op´t Anner un stött mi in´e Siet: "Jung, du büst doch op de hooge School gåhn ! Begrippst dat würklich nich ? - - Ik weer för De doch jümmers so minn, wieldat de Minschen dat sülvige Woort vun mi heel verscheden schrieven kunn´: Braegen mit ä oder Bregen mit e, Jahr mit a oder Jåhr mit o un so wieder. Süh, un jüßtso geiht dat nu ok mien Süster Hoogdüütsch: Egål, wat du nu schriffst: Schänke mit ä oder Schenke mit e, Panther mit h oder Panter åhn h - - all eendohn ! - - Is dat nich mål schöön ?"
Verdorig, all wat Recht is - - so harr ik dat um de Reform vun de hoogdüütsche Språåk noch nich sehn ! Åvers, Mudder Platt harr jå Recht ! Wat de Schrievers vun Mudder Platt al lang doht - - dat warrt jem nu ok för Süster Hoogdüütsch verlöövt ! Nu kunn ik ehr Freud goot verståhn !
Un ik müß ingeståhn: Ik freu mi mit ehr ! Is doch schöön, dat se de´n Kopp wedder wat höger dregen - - oder draegen - - kann ! Un dor grien se mi miteens an un fluustert mi to: "Weeßt, wat ik to ehr seggt heff: Du, heff ik seggt: Nu is dat mit uns Beid´, as mit Håås un Swienaegel ! Nu kann ik di toropen: Ik bün al dor !" - - Un denn hett se lacht, as so´n junge Deern !
Arne Bruhn, 1999 - in Europlatt överdrågen vun Peter Kollund, Rosendåhl 2000
besöök mål dat Institut för Nedderdüütsch in Bremen