Höör mal´n baeten to !

Tja - - "Höör mal´n baeten to !" heet dat, un jedereen weet, wat dat bedüden schall. Ok sünst hett uns faken een seggt: "Du, höör mal !" Un dat schull heten, wat een nu, in düssen Ogenblick, höör´n un dor denn meist ok noch wat to segg´n schull. Dat müß ´n nu ja eegens nich wieder verklaar´n, wenn dor nich dat lütt Woort "mal" in staeken daeh. "Kumm mal mit", - - dat heet so vael, een schall foorts mitkaam´. "Ik will di mal wat segg´n" - - ja, dat kriggt ´n foorts to höör´n. Dat lütt Woort "mal" bruukt wi faken noog un denkt uns dor nich vael bi. Ok denn nich, wenn wi to een seggt: "Se mööt uns mal besöken." Un nu heet dat aver nich, wat de anner uns foorts besöken schall. Nae, "mal", dat bedüüdt nich mehr as "bi Gelaegenheit" oder "wenn´t jüßtmal so paßt".

"Dor mutt ik mal gans nöödig oprüüm´", seggt een woll, wenn sik in Schapp un Schuuvladen so vael Kraam ansammelt hett, wat´n dor meist nich mehr dörchfinn´ kann. Man, dat Oprüüm´ kost ja allerhand Tiet, un överhaupt hett´n dor nich recht Lust to. Man, dat een tominnst weet, een mutt dor "mal" oprüüm´, dat is denn doch ok wat weert, nich ? Ach, dat gifft so vael, wat´n sik al lang vörnaam´ hett, so vael, wat een al lang "mal" dohn wull - - blots mit dat lütt Woort "mal" kann ´n elkeen Saak wunnerschöön op´e lange Bank schuven. Mit "mal" kann ´n sien goden Will´n wiesen, un dat strakelt ja so fein dat eegen Gewaeten. Man, een hett sik dor nich mit fastleggt, hett keen Verspraeken gaeven, wat ´n hool´n mutt. "Ik schrief di ok mal" - - na, dat kann tokamen Waek, dat kann tokamen Johr sien, un meist kümmt dor överhaupt nix na. Denn: Wennehr is "mal"?

Na, nu hebbt wi wedder ´n nee Johr anfung´n un hebbt noch Gelaegenheit, uns allerhand för düt Johr vörtonaehm´. Dat mutt ja nich all´ns foorts sien. Nae, een hett doch al verlaeden Johr seggt: "Tokamen Johr wüllt wi doch endlich mal . . . na, seggt wi to´n Bispill, mal wat för de Gesundheit dohn": Jeden Dag ´n Stünn spazeern gahn, nich mehr so fett aeten, fröher to Bett gahn un morrns Gymnastik maken. Tja - - "Nu mal los !" Dat Johr is al lang anfung´n. Man, betto hett´n to´n Spazeerngahn noch keen Tiet hat. Sünnavend is´n to´n Gröönkohlaeten inlaadt un sowat mag een sik ja nich ut´e Naes gahn laten. Klaar, dat´n denn nich so fröh to Bett kümmt, un denn mutt´n sik de´n Krimmi in´t Feernsehn ok bet to Enn ankieken, sünst faehlt ja wat. Anner´n Morrn is een mööd un kann to´n Glück segg´n, wat een nich verslapen hett un to rechde Tiet op´e Arbeit kümmt. Ja, wenn´t op´t Vörjohr togeiht, sodenn will een dor "mal" mit anfang´n . . . Un denn will een ok "mal" de´n ool´n Unkel besöken; verspraken hett´n em dat ja al lang, un "mal" kann ´n dat ja nu würklich dohn. Nae, nich foorts in de tokaam´ Waek. "Mal" will ´n ja ok de´n Keller oprüüm´, dor wull een so lang al bigahn. Man, eerst mutt ´n dor ja "mal" na fragen, wo een mit de´n överleidigen Kraam afblieven schall. Dat mutt ja nich glieks morrn sien, dor kann ´n sik de neegsten Daag "mal" um kümmern. Dat heet, denn hett ´n dat vergaeten, un eerst, wenn een dat wedder infallt: "Wat wull ik eegens noch ? - - Ach so, ik wull ja mal . . ." Na, un denn fangt dat schöne Spill mit de goden Afsichten wedder vun vörn an.

Tja, dor is woll nüms vun free: Jedereen hett so allerhand op sien Programm, wat he "mal" dohn will. Un wenn wi nipp op uns´ eegen Wöör acht, wo faken seggt wi: "Ja, dat will ik geern mal dohn, dor will ik mi mal um kümmern . . . Ja, dor mööt wi mal över snacken . . ." Un dat meent wi ok noch gans ehrlich ! Man, wat kümmt dor bi ´rut ? Tominnst nich so vael, as´n dat in´ Ogenblick meent hett. Dat Woort "mal" leggt sik as´n Naevelsleier üm de besten Afsichten ´rüm.

Tja, un ´keen nu in düssen Ogenblick denkt, he will dat in Tokunft aver anners maken, de schall sik man jonich tovael vörnaehm´! Dat Johr is lang: "Dor warrt düt oder dat denn ja woll mal glücken - - bi Gelaegenheit - - wenn´t jüßtmal so paßt . . ."

Irmgard Harder, 1973 - revideert vun Peter Kollund, Rosendahl 2001

torügg in de´n Hartmaand